افهم و تعلم تقرى

مختارات كمال فليج

كانك شيخ صحيح جالس الشعراء
و اقرى ذاك الكلام و افهم امعانيه
كان بغيت الذهب سال العيارة
يعيرو غير الذهب و الفضة على جيه
سوق النساء يا وليد ماهي تيجارة
قلتتهم غرسة شوكهم نايض فيه
الهدرة على الرجال ماش القمارة
الزم عليا القول بالشعر نكاكيه
راحو نساء بكري صحابت الفونارة
و البرنوس درق داوه مواليه
مصطفى بن براهيم كلامو صنارة
بن قيطون فحل الشعر يصيد بيه
بن قنون عزيز يفهم بالشارة
و المقراني عيون شحال بكات عليه
قعدة بن سهلة قعدة الأمرا
سي لخضر بن خلوف مانيش ناسيه
نزيدك بن حواء من أصل النعارة
تاريخهم فالقلب ماتقدرتمحيه
بالوهراني كتب عطانا تبشارا
من بعد مية عام رانا لحقنا ليه
على راس الحانوت سال العطارة
و حفير السيسان سال الي يبنيه
و صيادة الحوت اتبع البحارة
من يعرف للبحر لاش تخاف عليه
فرق بين المهر من ولد الحمارة
قالوها الولين في عزو خليه
جماعة بن عثمان ماهم خسارة
و جلايلي مختار حبيبي مانحشم بيه
سنجاسني و قدور قصبهم زهرارة
تراثنا تراث لا واحد يمحيه
المفصل اذا نخس يجبروه الجبارة
المرض أمر الله هو ألي يشفيه
و حبابي زنين ماهم هدارة
ولي دار الخير الله يخلف عليه
تعلمنا الحشمة مانا سمسارة
و نزورو لحباب الي يوصل نجيه
قعدة من ولى كيما الدردارة
الراجل باللسان و الوجه يقابل بيه
مايغلطوك شي ناس للخير نكارة
مانيش عليكم شق لصنام ألهيه
البارح كنت ونيس في عين الفوارة
و اليوم في يلل قمحي نغربل فيه
القصبة و ا لناي حباب الفقارة
و الشعر الملحون ذاك قرة عينيه
الهدرة فالظهر ماهيش شطارة
من ثرايت تسعة بلاك تربيه
أصلهم معروف أصل الغدارة
الساجي اذا جاح تباركلو غاشيه
جمع أهل العلم و أهل الحضارة
و جماعة الجياح لصحابو خليه
و جمع أهل الفن في الضيق صبارة
ذاك النيف طويل وراسو لا يطاطيه
هنايا مع لحباب معاهم قصارة
خالقي عندو الغيب انا ماندريه
رانا غير ضيوف و الدنيا مكارة
ولي يتبعها في شطها ترميه
مابقات لا سهرة مابقات قصارة
ليام ..الزينة رجعت على تاليه
كاتب ذا القصيد شابع مرارة
الظلم و المسروق انا مانشريه

عبد القادر بوجلطية