زمن نساى

*****

عبدالباسط الغرابلي
عضوإتحاد كتاب مصر

ومش عارف أجيبها أزاى
يازمنى وأنت ليه نساى
بتنسى أن أحنا كنا أصحاب
وأفكرك تقول لى لأ كداب
أعيد الحسبة م الأول
تقولى قول كمان طول
ماهو أنت أيه غير شوية قول
وممكن تفضل ع الربابة تقول
لحد الديك ماحايشقشق
تجيب الخلطة تتنشق
وتدى عطسة ورا عطسة
تخاف القطة والعرسة
ويزعل بطنا فى الدار
يخاف يجرى على الدوار
ينهق جحشنا الأعرج
وتقف البقرة تتفرج
على عطسة وجاية م النخاشيش
بتفتح الأزاز والشيش
وكل الناس هنا تسمع
كإنها عطسة من مدفع
ياسيدى هدى عطساتك
سمعنا معنى همساتك
يجوز نرجع نعيش تانى
فى ود وحب وأمانى
ونكتب للزعل باي باي
ولا يبقى الزمن نساي