المحليات
لن شفت مايجرحك من قاصر الباع
غموض اليامي -الوطن الآن
لن شفت مايجرحك من قاصر الباع
قدر معازيبك وخلك شمالي
وليا ارتفع صوته علي كل الاسماع
اسفه كلامه لايجيله مجالي
ماهوب خوفن من كلامه لياتاع
احسبك احسابك للامور التوالي
اصبر علي هرجه ولويوجع أوجاع
تقدير للمجلس ونقد الرجالي
ون كان قام ايكيل بالمد والصاع
لايلحقك شكه ومنزلك عالي
صمتك علي هرج الردي شين الاطباع
يرفع مقامك ياكريم السبالي
ون شفت ماله عنك مخرج ومرجاع
استاذن امعزبك واف الخصالي
قله كرمت اودمت دله ومقداع
تكفي وعندي شغل يابن الحلالي
وهرج الردي يعطي مفاجيج الارواع
واللوم جنب غترتك والعقالي
مايحرج العراف في كل الأوضاع
الا التلقف والخطا من اموالي
خبلا على شيل السواليف مطواع
افلان فيه اوفيه وفلان قالي
دايم لغرات الاجاويد تباع
يفرح ليا حصل عليهم خمالي
ولاضاقت الدنيا فجوج الله اوساع
ابعد وسج الرجال مع جو خالي
لاخذت لك مع جرهد البيد مذواع
برضن خلا توه من الوسم سالي
يجلا الهموم اللي ورا حدب الاضلاع
لوكان منته من هل القول سالي
لون مال اهروجهم فيك ميقاع
ومن هرجهم مافيه شي ايغدالي
من عز نفسه له علي المجد مطلاع
ومن ذلها يوطي سوات النعالي
صل الفرايض وعرف الوقت خداع
ترا حياتك تاليتها الزوالي
ولا تصير للاقراب هاجر وقطاع
اصل القرابه لو جفوك الوصالي
وطلبتك لله والمخاليق هجاع
تسوا قناطير الذهب والريالي
#خليل_بن_مجرور
