المقالات

بقولِّك إيه ..

132

اشعار دكتور احمد عبد الله بقولِّك إيه .. تخليني اجيبلك وردة يوم الصبح اسيبهالِك على بابِك ؟ تسيبيني حكيم مجذوب اهيم الصبح فى نهارِك وابات الليل فى اعتابِك ؟ بقولِّك إيه .. تخليني اعدّي عليكي والصبحية مولودة نروح نفطر فى وِسط الزرع فى جنينة وفى العصرية والمغرب انا عازمِك هانتغدى فى حضن النيل وانا عارفِك هاتتبسطي من المزيكا والمَيَّة وآخر شِعر انا كاتبه ومش حافظُه لكن حافظِك جميلة وعاشقة كل جميل بقولِّك إيه .. تخليني اجيلِك بعد نص الليل فى وسط الساقعة والمطرة ومتخَفٌيْ ؟ أبص عليكي فى الشباك وإنتي للسما باصّة يدوبك آخدلي كام نظرة فتدَفّيْ بقولِّك إيه .. تضُمٌيني فى حُضنِك ثانية اقوم ناسي شقىَ الدنيا، تبوسيني ؟ فتشفي ف قلبي مِيتْ احزان ارجَّع ضَمِّتِك لِيّا ٢٠٠ فدان من الاحضان ومِيْت بستان ونهر حنان وحنّية بقولِّك إيه .. انا عايش لكن غايب مَنِيش صاحي وإكلينيكي انا مَيِّتْ لكن بحضر فى عطر هواكي افوح مغرم كما القهوة وانا اهوىَ وبَهْواكي بقولك ايه .. ولا اتمنّىَ ولا استنّىَ ما تاخديني كدا معاكي !!